BACOLOD CITY — Hugot nga ginabantayan ang tanan nga mga wharf sa banwa sang Valladolid kasunod sang deklarasyon sang martial law sa Mindanao kag ginalauman ang spill over sang mga terorista.
Suno kay Police Senior Inspector Junjie Liba, hepe sang Valladolid Municipal Police Station, may tatlo ka mga wharf sa amo nga banwa nga sarang madungkaan sang sakayan-pandagat amo gani nga hugot gid ini nga ginamonitor.
Nahibaluan nga ginakahangaw-an sa karun ang spill over ukon pagsaylo sang mga terorista sa Mindanao padulong sa isla sang Visayas bangud sa ginpasangkad nga opensiba sang militar.
Pasiguro ni Liba, wala sang dapat nga kahangaw-an ang mga pumuluyo sang banwa sang Valladolid bangud may martial law man ukon wala, nakaalerto ang tanan nga miyembro sang police station agud nga bantayan ang seguridad sang mga pumuluyo.
