Ginpahayag sang project development officer sang Department of Education-Negros Occidental nga ang mga eskwelahan sa probinsya sang Negros Occidental ang may yara na sang gin-ubra nga Learning Continuity and Recovery Plan For Extreme Heat sang tinalikdan pa nga tuig.
Sa interview sang Bombo Radyo Bacolod kay Ian Arnold Arnaez, may yara na ang mga eskwelahan sang naplastar nga mga strategies agud nga indi man matam-an ang mga estudyante ilabi na sa tuman kainit nga panahon.
Suno kay Arnaez, ang tagsa-tagsa nga mga eskwelahan sa probinsya ang may yara sang nagkalain-lain nga strategy nga ginapatuman sa mga estudyante mangin sa mga manunudlo sa tunga sang kaintun sang panahon sa karun.
Dugang pa sini, indi mahimo nga ma-centralize ang mga tikang nga dapat pagahimuon sang mga eskwelahan sa probinsya bangud nga may nagkalain-lain ini nga kinahanglan ilabi na ang nahamtang sa nabukid mga bahin nga mga eskwelahan.
Suno diri,nakadependi sa mga eskwelahan kung ano nga mga tikang ang ila pagahimuon, kaangay sang pagmodular ukon lainun ang schedule sang mga classes.
Padayon man ang ila nga pag-abiso sa mga manunudlo kag mga estudyante nga lantawon gid permi ang health condition sang tagsa-tagsa ilabi na kung yara sa sulod sang classroom.
