Ginakalingawan subong sa social media ang pinasahi nga mga imbensyon sang isa ka lalaki sa Davao del Sur.
Si Robert Salvado sang Bansalan, Davao del Sur ang naka-imbento sang isa ka anti-corruption nga bangko kag toilet vendo.
Luwas sini, nag-imbento man si Robert sang tsinelas nga bato kag metal agud indi maguba sang mga ido.
Naghimo man siya sang kutsara nga built-in electric fan agud mapabugnaw ang mainit nga kape.
Paathag niya nga wala niya ginbaligya ang iya mga imbensiyon kundi ginhimo lang niya ini para sa content.
Apisar sini, ginpahayag ni Robert nga iya ginapangabudlayan ang iya mga imbensyon kag luyag man sini makapagpalipay sang mga tawo.
Si Robert ang isa ka electrician kag bata palang mahilig na siya nga mag-experiment sang mga butang.
Suno sa iya, kun makakita siya sang mga guba nga butang, ginadala niya ini sa ila balay kag kun kaisa mabaligya pa niya ang mga naayo nga gamit kaangay sang flashlight, lighter kag radyo.
Halin sa paghimo sang mga online tutorials, naglapta sa scoial media ang iya mga imbensyon.
Subong may income na siya nga P12,000 tubtob P15,000 sa isa ka bulan sa iya pag-vlog.
Bangud sini, nakabakal man siya sang kaugalingon nga motrosiklo kag amat-amat nga nakapatindog sang handum niya nga balay.
