Ginpanginbulahan sang spokesperson sang Police Regional Office 6 ang Bacolod City Police Office sa pagpanguna ni Police Col. Noel Aliño kag ang station commander sang Bacolod Police Station 8 kag ang mga operatiba sa effort sang mga ini sa pagkampanya batok sa illegal nga druga.
Sa interview sang Bombo Radyo Bacolod kay Police Lt Col. Arnel Solis, kun nakalusot ang P5.1 million nga balor sang suspected shabu kag nakuha naman sang mga street level individuals, mabudlayan naman ang mga kapulisan bangud malapit isa ka kilo ang nakumpiskar nga illegal nga druga.
Ginpakamaayo naman ni Solis, nga sa distributor pa lang nakuha na ini agud indi na maglapta pa.
Nagpanugyan man ini sa mga nagaengaged sa illegal nga druga nga mag-untat na sa ila indi maayo nga buluhaton kag dapat mangin leksyon na sa ila ang mga nagkaladakpan.
Dugang pa sini, kun magpadayon ang mga ini, mahimo nga wala sila madakpan subong, apang sa masunod nga inadlaw sigurado nga sila na ang madakpan bangud sila na ang subject sa police operations.
