Nadiskubrehan ang crack sa salog sang isa ka establisyimento sa Purok Providence, Brgy. Sum-ag, Bacolod City, kahapon sang aga, August 7, kag ginapatihan nga ini ang agyan kuntani sang mga kawatan.
Sa interview sang Bombo Radyo Bacolod kay Police Capt. Michael Tuburan, station commander sang Bacolod Police Station 9, kapin alas-11:00 sang gab-i sang Martes, may nabatian ang isa ka security guard sang Metro Supermarket nga may nagabakbak sa salog kag gintawag sini ang kaupod nga mga security guard para magpatigayon sang inspection.
Suno diri, kapin alas- 5:00 sang kaagahon na nila nadiskubrehan ang crack sa salog nga gilayon nila nga ginreport sa kapulisan.
Kaupod ang Scene of the Crime Operations (SOCO), narekober sang mga kapulisan ang isa ka hydraulic jack, isa ka steel saw, duha ka big crew bar, isa ka small crew bar, duha ka big flat screwdriver, isa ka grinder, isa ka bolt cutter, kag mga hard wood.
Pahayag ni Tuburan, nga ang crack ang ginkutkot sang tatlo tubtob apat ka tawo paagi sa manhole sang drainage sa tinutuyo nga pagpangawat.
Ginalantaw nga posible nga tinutuyo nga kawatan ang automated teller machines (ATM) kag bangko sa sulod.
