Ginpakigbahin sang mga Lin-ay sang Negros 2024 ang ila nga tagsa nga mga adbokasiya kag pagpanawagan sa pagsanyog sang probinsya.
Sa interview sang Bombo Radyo kay Kyla Marie Romarate sang Victorias City nga ginkoronahan bilang Lin-ay sang Negros 2024, tuman ang kalipay sini nga nagbunga ang tanan sini nga ginpangabudlayan sa pagdaog sa kompetisyon.
Suno diri, bilang third year student sa kurso nga Doctor of Veterinary Medicine iya ginaduso ang adbokasiya nga nagabulig sa mga kasapatan.
Kaangay na lamang sa mga mangunguma nga nagagamit sang karabaw nga nagabulig sa ila palangabuhian, kasubong man nga nakita sini nga dako ang nangin epekto sang African Swine Fever sa hog industry kag sa mga pet owners nga mangin responsable sa pag-atipan sa mga kasapatan.
Naga-intra man ini sa karun sa mga animal welfare group.
Sa karun, suno sa beauty queen, maga-focus ini anay sa pagtuon, apang kun may yara sang oportunidad para sa iya nga makapasakop sa mga beauty pageant, bukas naman ini nga magbaton, ilabi nga natun-an sini sa journey bilang Lin-ay sang Negros 2024, nga nothing is imposible.
Samtang, pag-edukar naman sa mga kabataan kag pagpalapta sang awareness ang adbokasiya sang nag 1st runner up sa Lin-ay sang Negros 2024.
Sa interview sang Bombo Radyo kay Zoe Clarisse Limson sang banwa sang Cauayan, luyag sini nga magpalapta sang awareness angot sa mga nagapanguna nga isyu nga gina-atubang sang tagsa ka mga komunidad.
Suno sa first year student nga may kurso nga Bachelor of Secondary Education (BSEd) major in Social Studies, magamit niya ang iya natun-an nga maka-edukar sa mga kabataan.
Para kay Limson, ang tagsa ka komunidad may yara sang nagkalain-lain nga mga problema, kag suno diri kun kaisa ginabisita sini ang area kag ginatun-an ang isyu agud nga mapangitaan sang solusyon.
Kasunod sa iya adbokasiya, nagpahanumdon ini nga kun ano ang ginahimo sang isa ka tawo ini ang makaapekto sa iya palibot amo nga mas maayo kun tinguhaan nga mangin maayo nga indibidwal.
