Amat-amat na nga ginahitso ang paghatag sang financial assistance para sa mga vendors sa Vendors Plaza sa Barangay 12, Bacolod City nga indi maka-avail sang pwesto.
Nahibaluan nga naga-umpisa na sa pagtukod sang mga kudal ang SM Prime Holdings Inc. para sa patigayunon nga rennovation sa Vendors Plaza, apang indi tanan ang mahatagan sang relocation sa Barangay Vista Alegre.
Ini ang ginalakipan sang mga vendors nga nagabaligya lamang apang wala sang balay sa Barangay 12, nga indi ma maulamid sa redevelopment sang lugar, apang madulaan sang palangabuhian.
Sa pahayag ni Bacolod City Legal Officer Atty. Romeo Carlos Ting Jr., pinaagi sa Department of Social Services and Development, nagdesisyon si Bacolod City Mayor Alfredo “Albee” Benitez nga hatagan sang tig-P10,000 ang mga nasambitan nga vendors.
Ini agud sila ang may magamit man sa ila pagpangita sang masayluhan nga pwesto.
Ini ang amat-amat pa nga ginaproseso kag sila ang nagahulat lamang sa listahan nga igasumiter sang Barangay 12.
Sa pihak nga bahin, nagpasalig naman ang alkalde nga ginaplastar na sang City legal office ang mga kinahanglan, gani kinahanglan na lamang nga magkoordinar sa ila ang mga apektado.
Suno sa alkalde kun may ara sang demolition kag relocation, ginpahanumdom na sini sa City Legal Office nga hangpon gid ang mga pumuluyo.
Pahanumdom sini nga kinahanglan sa pagbiya sang mga pumuluyo sa ila mga daan nga panimalay, dala gihapon ang mga ini ang yuhom, ilabi na nga ang Bacolod City ang City of Smile
