BACOLOD CITY — Bukas ang mga manunudlo sa Bacolod nga magserbe sa electoral board sa Barangay and SK Elections apang sa pila ka mga kondisyon.
Nahibaluan nga indi na sa karon compulsory ang pagserbe sang mga manunudlo sa tion sang eleksyon matapos napasar ang Republic Act 10756 sang tinalikdan nga tuig.
Sa interview sang Bombo Radyo, ginpahayag ni Alliance of Concerned Teachers – Negros Occidental chairman Gualberto Dajao nga madamo ang ila mga concerns nga kinahanglan masabat sang Commission on Elections.
Suno diri, kuntani magabulig man ang Comelec sa tion nga malakip ang maestra ukon maestro sa election protest sang isa ka kandidato bangud magluwas nga ini ang huol, dako pa ang magasto.
Atrasado man suno kay Dajao ang paghatag sang ila honorarium sa tion sang eleksyon.
Nagahingyo sila nga kuntani ihatag ang katunga sang honorarium antes ang adlaw sang piniliay kag katunga naman kun matapos na.
Nagaayo man ang grupo nga himuon nga pito ka adlaw ang service credits sang mga manunudlo sa baylo nga lima lang ka adlaw.
