Ginbalabagan sang mga nagarally-protesta nga mga katapo sang Bacolod Alliance for Commuters Operators and Drivers Inc. (BACOD) ang mga nagabyahe nga traditional jeepney sa idalum sang flyover sa Barangay Bata, Bacolod City.
Kun sa diin tanan nga mga nagabyahe nga traditional jeepney units ang ila nga ginapadulog kag ginasugilanon nga updan ang ila kawsa.
Panindugan sang BACOD nga palarehas lamang ang ila nga luyag sa pagpamatok sa Public Utility Vehicle Modernization Program gani sila ang dapat nga updan.
Suno sa mga ini, unfair kun sila ang naga-untat byahe apang may iban nga nagahakot sang pasahero kag nagalabay-labay pa sa ila atubang.
Iban sa mga nagabyahe nga traditional jeepneys ang nag-ugyon man sa hingyo nga indi maglabay sa dalan kun sa diin nagapatigayon sang rally protesta.
Sa pihak nga bahin, indi naman mahimo nga indi pagsapakon sang mga nagabyahe nga nagalabay sa idalum sang flyover ang pagpapundo sa ila apisar nga sila ang may pasahero bangod nagapatunga ang mga ralihista sa dalan, kag mabungguan kun indi magdulog ang mga jeep.
Wala naman nag-init pa ang sitwasyon indi kaangay kahapon sa Barangay Singcang-Airport kun sa diin may-ara sang ginpulihan kag ginguba ang traditional jeepney unit.
Apang sa pagtsekyar sang Bombo News Team sa area, nasaksihan mismo nga may mga ralihista nga matapos mapadulog ang nagabyahe nga jeep, ginabutangan sang miyembro sang lansang ang malabayan sang royda agud ini ang maflat, samtang may mga balon man nga bato ang iban nga nagaprotesta.
Agud makontrolar ang sitwasyon, gilayon man nga nag-augment ang mga personnel sang Bacolod Traffic Authority Office (BTAO) kag mga katapo sang Bacolod Police Station 3.
