Ginbatikos ni Pamplona, Negros Oriental Mayor Janice Degamo ang mga kabutigan nga pahayag nga ginabuy-an sang kampo ni expelled Negros Oriental Congressman Arnolfo “Arnie” Teves Jr.
Sa ginpagwa nga video message sang alkalde sa social media, ginpahayag sini nga siya kag ang pamilya sang siyam ka iban pa nga biktima sang Pamplona Massacre ang lunsay nakibot sang nabasahan ang report nga ginpagwa sa pagkapriso si Teves sa Timor Leste.
Nakaginhawa naman ang mga ini matapos mahibaluan nga liwat man nga gin-aresto si Teves makaligad sang masobra 30 minutos.
Ini ang gindugangan pa sang mga ginpagwa nga pahayag sang kampo ni Teves nga may ara sang nagrequest nga mapabalik sa Pilipinas si Teves, apang ini ang gin-aresto.
Panindugan sang alkalde nga kabutigan ang pahayag bangod sila mismo ang nagapanawagan nga mapapauli sa Pilipinas si Teves.
Ini agud maatubang na sini ang kaso sa pagpatay kay late Negros Oriental Governor Roel Degamo kag siyam ka iban pa, kasubong man ang mga gina-alegar ginpapatay sini sang tinalikdan pa nga mga tinuig.
Indi man matuod ang pahayag sang anay Kongresista nga siya ang ipapatay pagdangat sa airport.
Nagapati si Degamo nga ang ginakahadlukan ni Teves amo ang mahimo paggwa sang dugang pa nga mga biktima sini sang pagpatay, pagpangagaw sang duta kag pagpang-abuso.
Sa panawagan sini kay President Ferdinand “Bongbong” Marcos Jr. nga sa iban nga pungsod na lamang i-expedite bangod ginabayolar ang iya tawhanon nga kinamatarong sa Pilipinas, panindugan ni Degamo nga kaangay nga ginagub-an sini ang Pilipinas.
Suno sa nabalo nga asawa ni late Governor Degamo, indi ang Pilipinas ang napun-an sang human rights violation, sa baylo si Teves, amo ang isa sa pinakamalala nga human rights violator.
Panindugan sini nga bisan san-o si Teves ang indi nangin biktima bangod ini ang perpetrator kag ini ang mastermind.
