Madamo sang mga pagbag-o sa pamunuan sang Bacolod City Police Office bangod sa pila ka personnel nga ginsaylo sang designation kag mga nag-schooling para sa pagpasaka sang ranggo.
Sa interview sang Bombo Radyo Bacolod kay Police Lt Col Lester Leada, Deputy City Director for Operations sang BCPO, si BCPO Spokesperson Police Captain Dax Santillan ang nagapaidalom sa Schooling.
Gani temporaryo nga ginbalik si Police Captain Liberty Indiape bilang tagpamaba, dugang sa iya existing position bilang pinuno sang BCPO-Women and Children Protection Desk.
Ang City Community Affairs and Development Unit sang BCPO nga ginapamunuan man ni Santillan ang temporaryo naman nga pamunuan ni Police Major Kenneth Ray Militar.
Samtang ang pinuno sang Bacolod City Mobile Force Battalion nga si Police Colonel Raynold Rosero ang ginsaylo naman bilang pinuno sang 2nd Negros Occidental Mobile Force Battalion sang Negros Occidental Police Provincial Office, nga nakasakop sang 4th tubtob 6th district.
Ginbutang naman nga officer in charge sang BMFC si Police Lt Col Joeffer Cabural nga head sa Bacolod City Mobile Patrol Unit.
Ang pwesto nga ginbayaan ni Cabural ang temporaryo nga ginadumalahan ni Police Captain Ramie Sayson.
Ginbalik naman bilang pinuno sang Regional Personnel and Record Management Unit sang Police Regional Office – Negros Island Region si Police Major Lyndon Manilla, ang anay station commander sang Bacolod Police Station 8.
Ginbutang naman nga officer in charge sa Bacolod Police Station 8 ang iya deputy station commander nga si Police Lt Ildefonso Leonardo Jr.
Samtang magapaidalom man sa schooling ang station commander sang Bacolod Police Station 10 nga si Police Captain Jenus David.
Siya ang temporaryo nga buslan sang iya deputy nga si Police Lt Rowena Magan.
