Ginkalipay sang mga Filipino sa Estados Unidos nga liwat nga magapungko bilang presidente si Republican Donald Trump.
Suno kay Joenel Torillo, Bombo International Correspondent sa Pennsylvania, USA, ang nasambit nga estado sang America ang swing state kun sa diin wala mahibaluan kun sin-o ang pagabotohon sang mga tawo.
Suno diri, sa karun ang Pennsylvania ang Red ukon nagboto kay Donald Trump bangud luyag sang mga botante sang pagbag-o.
Pahayag sini nga nagakabatyagan sa karun sang mga tawo ang nagakatabo nga pagmahal sang mga balaklon tubtob sa pagsulod sang mga illegal immigrants bangud sa bukas ang border.
Dugang pa sini nanamian sila kay Trump bangud ini ang indi luyag sang abortion, indi luyag sang giyera kag isa ka negosyante nga makatutok sa pagpasanyog sang ekonomiya.
Pahayag sini nga karun nga Democrat ang nagapalakat sang pungsod, tuman ka taas sang bili sang mga balaklon kasubong man sang buwis.
May mga tinion pa nga ginabasol sang nagapungko ang mga pumuluyo kun indi ma-materialize ang mga plano sang mga ini apisar nga sila ang nagapungko sa pwesto.
Suno kay Torillo, ang mga pumuluyo ang wala na nanamian sa nagakatabo sa pungsod gani ginpili sang mga ini ang may maayo nga plano para sa America.
Wala man napunggan sang isa ka Filipino sa California, USA nga magpabutyag sang iya nga kalipay matapos nga magdaog bilang presidente sang Estados Unidos si Republican Donald Trump.
Suno kay Allan Mandid, Bombo International News Correspondent direkta sa California, USA, apisar nga noted ang nasambit nga estado sang America nga blue state ukon Democrats, nalipay ini nga si Trump ang nagdaog bangud indi sini luyag ang gyera ukon kagamo.
Suno kay Mandid, ang California amo ang entertainment hub kun sa diin madamo sang mga artista kag kalabanan sang mga ini ang nag-endorso kay US Vice President Harris.
Dugang sini nga ang mga programa nga ginapahayag ni Trump sa kampanya ang nagamit naman sini sadto sang nagpungko nga presidente sang 2017.
Suno kay Mandid, nagustuhan si Trum sang mga Pilipino bangud kasubong sa atun indi sini luyag ang kagamo ukon gyera.
Suno diri, ginpahayag sang Foreign Affairs adviser ni Trump nga sang ini pa ang nagapungko bilang presidente wala sang natabo nga giyera, kag kun may ara man ini bangud sa terrorismo.
Indi kaangay sa nagakatabo sa karun sa Israel-Hamas; Ukraine-Russia, ang konflikto sa China-Taiwan kag Pilipinas-China bangud sa West Philippine Sea.
Isa man sa nalipay ang Filipino sa Houston, Texas sa kadalag-an ni Republican Donald Trump bilang presidente sang Estados Unidos sa natapos nga US Presidential Elections.
Suno kay Noor Moraña, Bombo International News Correspondent sa Houston Texas, USA, nalipay ini kag wala ini mahuya nga ipakita ang iya nga mga kalo nga nagasimbolo sang Republicans.
Suno diri, bilang katoliko ukon Kristiyano, indi ini maluyag sang abortion gani siya ang nagboto kay Trump nga anti-abortion.
Ginalantaw man sini nga magalinong na ang kalibutan sa pagpungko ni Trump bangud ginataha ini sang World Leaders.
Nagpanawagan ini nga pangamuyuan si Donald Trump nga mahatagan sang kusog kag kabakod agud pamunuan sang maayo ang Estados Unidos.
