Proud ang mga Filipino sa Estados Unidos sa ginapatigayon sa karun nga trilateral summit sa tunga sang mga pinuno sang Amerika, Pilipinas kag Japan.
Suno kay Bombo International Correspondent Pinoy Gonzales direkta sa Houston, Texas, ginakalipay sang mga Filipino ang summit nga ginapatigayon sa karun sa tunga nanday President Ferdinand Marcos Jr., US President Joe Biden kag Japanese Prime Minister Fumio Kishida kun sa diin ginaistoryahan ang natuhoy sa agression sang China sa West Philippine Sea kag ang mutual defense treaty sa tunga sang Amerika kag Pilipinas.
Apang suno kay Gonzales, lunsay pangamuyo sang mga Filipino didto nga wala sang may magluntad nga ginamo kag gyera sa tunga sang Pilipinas kag China bangud sa ginaagawan nga teritoryo.
Magluwas sa maritime security, gina-istoryahan man sa summit ang pagpasanyog sang relasyon sang tatlo ka pungsod, mga investments kag suporta sa ekonomiya.
Samtang, ginalauman naman nga makigkita si President Marcos sa Filipino community sa Washington antes ini magbalik sa Pilipinas.
