Nagapanawagan sang kalinong ang mga lider sang mga pungsod nga miyembro sang Association of Southeast Asian Nations (ASEAN) sa Middle East, suno kay President Ferdinand “Bongbong” Marcos Jr.
Ini ang ginpahayag sang presidente sa ginhiwat nga press conference matapos ang ika-48 ASEAN Summit kag Related Meetings kahapon sang Biyernes.
Suno kay Marcos, mabudlay makapangita sang anuman nga solusyon samtang nagapadayon ang gyera kag pangbomba sa rehiyon.
Ginpahayag man sang presidente nga nagpagwa na sang pahayag ang mga foreign minister sang ASEAN nga nagapanawagan sa tanan nga kampo nga untaton na ang gyera kag liwat nga buksan ang Strait of Hormuz kag mag-ugyon na para sa peace treaty.
Dugang pa, nagapabilin nga gamo ang sitwasyon sa rehiyon bangud indi maathag kun epektibo pa ang ceasefire kag kun kabahin diri ang tanan nga grupo nga kalakip sa gyera kaangay sang Israel kag Hezbollah.
Sa joint statement nga ginpagwa kahapon, nagpabutyag sang dako nga pagkabalaka ang mga lider sang ASEAN sa nagalala nga sitwasyon sa Middle East.
Ginpahanumdom sang mga lider ang importansya sang pagmentinar sang kalinong, pagkamalig-on, kag pag-uswag sa rehiyon, kasubong man sang pagduso sang diplomasya kag dayalogo bilang pamaagi sa pagsolbar sang mga konflikto.
Dugang pa, ila man ginpaathag ang importansya sang seguridad sa kadagatan kag pagmentinar sang kahilwayan sa pagbyahe, ilabi na sa Strait of Hormuz, nga isa ka importante nga ruta para sa global trading kag suplay sang enerhiya.
