Gina-engganyo ni Bacolod City Councilor Renecito Novero ang mga dalagkuan kag pribado nga mga kompaniya sa ciudad nga magprocure sang bakuna para sa ila mga empleyado.
Sa interview sang Bombo Radyo Bacolod kay Novero, chairman sang Vaccination Center Action Team sa ciudad, aminado ini nga indi masarangan sang city government ang kabilugan nga presyo kag suplay sang bakuna para sa kabilugan nga numero sang mga pumuluyo.
Gani, gina-engganyo sang konsehal ang mga pribado nga kompaniya nga magbakal sang kaugalingon nga COVID vaccine para sa ila empleyado.
Nahibaluan nga may yara sang masobra 600 mil ka mga pumuluyo ang Bacolod.
Suno kay Novero, indi gid makasarang ang ciudad kun ini ang maga-shoulder sang bakuna para sa tanan.
Gina-abi-abi naman sini ang tikang ni Dr. Rogelio M. Florete, chairman sang Bombo Radyo Philippines, nga pabakunahan ang tanan nga empleyado sini sa idalom sang Florete Group of Companies.
Samtang, ginkumpirmar naman ni Novero nga may yara sang Joint Circular No. 2 series of 2020 ang Department of Education, Department of the Interior and Local Government kag Department of Budget and Management nga nagatugot nga gamiton ang special education fund agud ibakal sang bakuna para sa mga manunudlo, estudyante kag non-teaching personnel.
Suno sa iya, dako na ini nga bulig para sa ciudad.
Nahibaluan nga may yara sang 119,215 personnel ang DepEd Division of Bacolod nga ginalakipan sang mga manunudlo, non-teaching personnel kag mga estudyante halin kinderagarten tubtob Senio High School
