Ginakalipay sang executive vice president sang STI-West Negros University nga ginpamatian ni Bacolod City Mayor Evelio “Bing” Leonardia ang ila hingyo nga malakip ang mga manunudlo kag staff sang private schools sa priority list nga mabakunahan sang COVID-19 vaccine.
Sa interview sang Bombo Radyo Bacolod kay Ryan Mark Molina, ginpahayag sini nga nakigsapol sila sa alkalde sang Huwebes agud nga magpasa sang position paper nga nagahingyo nga malakip sila sa mangin prayoridad nga mabakunahan.
Suno sa iya, nangin produktibo ang ila nga pagsinapol bangud nga ginpamatian gid sila ni Leonardia.
Gilayon sila nga ginhatagan sang registration form para sa vaccination program agud nga mahibaluan kun pila ka bilog nga mga manunudlo kag staff sang mga pribado nga eskwelahan sa Bacolod ang luyag mag-avail sang bakuna.
Sa pagbanta sini, 30% sang iya mga empleyado sa STI-WNU ang luyag magpabakuna.
Ginpasalig man ni Molina nga handa ang mga pribado nga eskwelahan nga mangin vaccination centers.
Handa man ang ila nga mga nursing kag medicine students nga mangin volunteers para makabulig sa city health sa vaccination program.
Suno kay Molina, ang pagpabakuna ang isa ka paagi agud nga makabulig sa pagpugong sang paglapta sang virus.
