Nagapati ang kongresista sa 1st district sang Negros Oriental nga matriple ang government programs kag mga proyekto sa tatlo ka probinsya sa pagtukod sang Negros Island Region.
Sa interview sang Bombo Radyo Bacolod kay Negros Oriental 1st District Representative Jocelyn Limchaichong, welcome gid sa ila ang pagpirma ni President Ferdinand ‘Bongbong’ Marcos Jr. sa makabig historical legislation.
Mangin mas accessible man para sa probinsya sang Negros Occidental, Negros Oriental kag Siquijor ang mga regional offices kaangay sang National Economic and Development Authority (NEDA) kag sila ang makatukod na sang kaugalingon nga Economic Development Teams.
Pinaagi sini mas madasig man ang pagpalab-ot sang mga programa sang gobyerno kun ipaanggid pagproseso sang Negros Occidental sa Iloilo kag sang Negros Oriental sa Cebu.
Pasalig ni Limchaichong nga may prior agreement na nga apisar mas dako ang populasyon kag sakop sang Negros Occidental, mangin patas ang distribusyon sang proyekto sa tatlo ka probinsya.
Sarang naman nga mapatuman ang economic development goals kag matrabaho ang connectivity.
Isa sa tutukan sang mga ini nga matrabaho amo ang infrastructure road network agud mangin mas mahapos ang pagtabok-tabok sa tunga sang Negros Occidental kag Negros Oriental.
Magahinun-anon man ang mga legislators, gobernador kag alkalde agud maplastar ang internal Implementing Rules and Regulations (IRR) sa paglaom nga masuguran kag mabutangan sang budget sa 2025.
