Ginakalipay sang Presidente sa Bacolod City Public School Teachers’ Federation nga gin-aprubahan na ni President Ferdinand “Bongbong” Marcos Jr. ang ila ginahulat-hulat nga pagbalik sang School Calendar.
Sa interview sang Bombo Radyo Bacolod kay Richard Gelangre, principal sa Bacolod City National High School, ginlobby sang Alliance of Concerned Teacher’s (ACT) sa Department of Education (DepEd) nga amat-amat mabalik ang schedule sang klase tubtob sa 2027.
Dako ang kalipay sang mga ini nga mas mapatemprano ang pagbalik pinaagi sa pahanugot sang Presidente kun sa diin ang opening sang School Year 2024-2025 ang maga-umpisa sa Hulyo 29, 2024 kag magatakop sa Abril 15, 2025.
Ang School Year 2025-2026 ang maga-umpisa naman sa Hunyo 16, 2025 kag magatakop sa Marso 31, 2026.
Ini ang dako nga bulig sa mga estudyante bangod gamay na lamang ang alantuson nga kainiton sa bulan sang Abril sa masunod nga tuig.
Apisar nga nabuhinan sang 15 ka adlaw ang regular school days, ini ang masolusyunan man pinaagi sa pag-alokar sang 90 tubtob 95 porsyento sang mga manunudlo sa classroom.
Suno kay Gelangre dapat mabuhinan ang mga projects kag programs.
Paathag sini nga sa masami may mga ginarequire nga reports nga urgent nga ginapangita sang DepEd Regional Office, gani mapilitan ang manunudlo nga biyaan ang ila mga estudyante agud matapos ang report.
May suhistyon man ang DepEd nga agud makafocus ang mga teaching personnel sa pagtudlo, ang mga reports ang ihatag sa principal kag administrative personnel.
Apang bangod ini ang magadugang naman sa ila palas-anon, panawagan na lamang ni Gelangre nga dugangan sang DepEd ang support staff sa mga eskwelahan.
