Ginkumpirmar ni Bacolod City Administrator Em Ang nga magluwas sa mga frontline health workers, pagahimuon nga prayoridad sang national government ang mga naga-edad 18 tubtob 59 anyos sa pagahatagan sang bakuna batok sa COVID-19.
Sa interview sang Bombo Radyo kay Ang, ginpahayag sini nga nagpatigayon sang general assembly ang tanan nga mga alkalde sa idalum sang League of Cities nga ginapamuan ni Bacolod City Mayor Evelio Bing Leonardia kahapon kaupod si Vaccine Czar Sec. Carlito Galvez Jr.
Suno sa city administrator, sa nasambit nga assembly, gin-anunsyar ni Galvez nga imbes nga mga senior citizens kag vulnerable sector ang una nga pagahatagan sang COVID vaccine, himuon na sa karun nga prayoridad ang mga yara sang working age group bangud sila ang nagagwa kada adlaw kag ang may mas dako nga posibilidad nga malatnan sang virus.
Gindugang man sini nga ang nasambit nga tikang ang para man amat-amat nga makarecover ang ekonomiya sang pungsod.
Suno diri, ginpahayag sang secretary nga ang una nga 50,000 doses sang Sinovac vaccine ang mangin available na sa Pilipinas sa bulan sang Pebrero kag 25 million doses ang kabug-usan nga pagabatunon sang pungsod tubtob Disyembre.
Pito tanan ka mga pharmaceutical companies ang magahatag sang supply apang sa ikaduha nga quarter pa sila magasugod magluwas sa Sinovac.
Suno kay Ang, nalakip sa mga local government unit nga prayoridad sa pagahatagan sang vaccine amu ang Bacolod City, Iloilo, Davao, Cebu, Baguio kag tatlo ka mga ciudad sa National Capital Region.
