Aminado ang Filipino Nurse sa New York, USA nga nangin headlines ang magnitude 4.8 nga linog sa ila bangod tumalagsahon lamang makabatyag sang pagtay-og sa lugar nga ginahamtangan sang madamo nga mga century old buildings.
Sa interview sang Bombo Radyo Bacolod kay Ludovico Baqueriza III, Bombo International News Correspondent derekta sa New York City, New York, USA, yara ini sa ospital sang magtay-og apang wala sini mabatyagan bangod siya ang nagalakat.
Apang nakita sini ang pagpanic sang mga katrabaho sini kag pila ka mga pasyente nga gilayon nagguluha sa ila nga mga kwarto.
Suno kay Baqueriza, naglawig sang 10 tubtob 30 segundos ang pagtay-og samtang nagadangat naman sa 10 tubtob 13 ang nagluntad nga aftershocks.
Paathag sini nga nangin dako nga balita ang pagtay-og bangod tumalagsahon lamang matabo ang linog sa New York kag madamo sang Century Old Buildings sa lugar nga ginakahangawaan nga marumpag.
Sa maragtas, sang 1884 ang pinakamabaskog nga linog nga narecord sa ciudad nga nagadangat lamang sa magnitude 5 kag ang linog sang 2019 nga nagdangat sa magnitude 4.
Ginakahangaw-an sang mga ini ang posibilidad nga liwat magatay-og ang mabaskog nga linog sa New York nga indi na masarangan sang pundasyon sang mga building.
Apang suno kay Baqueriza wala sang reported casualties sa nasambitan nga linog kag may-ara lamang sang galagmay nga structural damages kaangay sa isa ka library sa sentro sang ciudad.
Agud makaseguro, gilayon man gintsekyar sang mga opisyal sang gobyerno ang mga train tracks kag airport kun may ara sang kahalitan.
