Nagtambong ang mga punong barangay sa ciudad sang Bacolod kag pila ka miyembro sang Sangguniang Panlungsod sa imbetasyon sang alkalde sang ciudad para sa isa ka consultative meeting sang tinalikdan nga adlaw.
Ini agud nga estoryahan ang operasyon sang electric bike ukon electric tricycle sa dalanon sang ciudad sang Bacolod.
Gindiskusyunan sa consultative meeting amo ang Land Transportation Office Administrative Order No. 2021-039, nga nagaestablisyar sang pagsulundan para sa classification, registration kag operation sang tanan nga sahi sang mga electric vehicles sa Pilipinas.
Kalakip man sa administrative order amo ang specification requirement, penalties kag iban pa.
Sa pahayag ni Bacolod City Mayor Alfredo “Albee” Benitez, ang tinutuyo sang meeting nga maklaruhan ang mga pamangkot sang mga opisyales sang barangay ukon ang mga punong barangay.
Kasubong man nga maghatagan sang solusyon ilabi na ang pagpangdakop sang mga nagabiyahe sang ebike sa barangay kag sa iban man nga bahin sang ciudad.
Dugang pa sang alkalde nga mismo ang mga punong barangay ang nagpalapit agud nga madiskusyunan man ang kampanya sang Bacolod Traffic Authority Office (BTAO) sa illegal parking.
Ang mga punong barangay man ang ginakadtuan sang mga e-bike kag e trike drivers kag magreklamo sa tion nga madakpan bangud ini lamang ang ginakuhaan nila sang palangitan-an.
Sa karun, wala pa sang konkreto nga plano para sa pagregulate sang mga ebike nga nagabiyahe sa ciudad apang ginkonsiderar sang alkalde ang mga sentimyento sang mga ini.
Ginalantaw nga iregulate na lamang ang mga ini agud nga indi man madulaan sang palangitan-an.
