Nagapanawagan ang mga pumuluyo sa Hacienda Sta. Maria 1 kag 2 sa Barangay E. Lopez, Silay City sa contractor sang ginatukod nga Solar Power Plant, nga sila ang mabuligan karun nga tuman ang yab-ok tuga sang ginapatigayon nga construction.
Sa interview sang Bombo Radyo sa isa ka iloy nga residente sa lugar, ang lugar ang anay kakampuhan apang ginhawanan agud nga tukuran sang Solar Power Plant.
Paathag sini nga tatlo na ka bulan ang ila nga pag-antos bangod kaangay nga desyerto na sa ila nga lugar bangod sa madamol nga yab-ok nga halos nagakadula na ang visibility partikular na kun tuman ang init.
Bangod sini ang duha niya ka kabataan ang nagabatyag naman sang sip-on kag ubo.
Nagapasalig man sa ila ang nagapatigayon sang construction nga magabulig, apang ang ila nga pagbasa sang tubig ang yara lamang sa dalan.
Panawagan sang iloy nga sila ang mahatagan sang bulig bisan refund lamang sa bulong sang mga nagbalatian.
Sila ang ginhatagan man sang surgical mask apang ini ang magabok kag madasig lamang nga nagakautod.
Halos ginatamad naman sila maglimpyo sa balay bangod ang ila mga pagkabutang, panapton kasubong man pagkaon ang dugay-dugay man gihapon nga nagakapuno sang yab-ok.
Sa pihak nga bahin, nagakasubo man ang isa ka senior citizen sa lugar bangod apisar sa pasalig, wala man sila ginabuligan sang contractor.
Sa interview sang Bombo Radyo Bacolod kay Lydia Laxamana, siya ang gina-ubo na kag tuman ka katol ang tutunlan bangod sa plema dala sang tatlo na ka bulan nga paghaklo sang yab-ok.
Magluwas diri, nagasakit naman ang ulo sang senior citizen.
Ginpakamaayo na lamang sini nga nag-ulan kahapon kag napahagan-hagan ang yab-ok.
Paathag sini nga sila ang sa kampo nagatrabaho, apang karun wala sang matrabaho gani wala man sang inugbakal sang bulong.
