Ginapapreparar na ang mga residente sa Florida, USA sa posibilidad sang pagluntad sang blackout kadungan sa paglaslas sang Hurricane Milton.
Sa interview sang Bombo Radyo Bacolod kay Ferolyn Galeno Posecion, Bombo International News Correspondent sa Florida, USA, siya ang isa palang ka bulan sang mag-abot sa Florida para sa training antes ideploy sa lain nga estado bilang nurse.
Si Posecion ang anay nurse sa Kingdom of Saudi Arabia antes magsaylo sa Estados Unidos, kag antes magtrabaho sa ospital sa North Carolina, siya ang kinahanglan pa nga magtraining sa Florida State University.
Paathag sini nga nakalandfall na ang Hurricane Milton kag ang tuman nga ginabantayan amo ang Tampa Bay.
Bangod sila ang tatlo ka oras nga byahe ang distansya sa lugar, aminado si Posecion nga pagmadlos lamang ang ila mabatyagan kag dyutay nga ulan.
Apang apisar nga malayo sa coastal areas, sila ang ginapaprepar na sang flashlight, pagkaon kag tubig sa posibilidad sang pagkadula sang power supply.
Samtang magalabay lamang ang Hurricane Milton apang mataas gihapon ang risgo bangod sa storm surge nga makapataas sang pagbalod sa 12 feet tubtob 18 feet.
Bangod sini, nagpatuman na sang forced evacuation sa Zone A kag B nga coastal areas.
Bisan ang alkalde sa Tampa City ang nagpanawagan naman nga magbiya na bisan ang mga yara sa evacuation centers, bangod indi naman safe sa lugar.
Nagakahubsan naman sang supply sang gatong ang mga gas stations bangod kadam-an sa mga may salakyan ang nagahoard na sang gasolina.
Aminado si Posecion nga nagapangaman na ang gobyerno bangod sang damlag lamang, dako ang nangin kahalitan sang Hurricane Helene kun sa diin isa sa mga nahalitan ang North Carolina nga tubtob sa karun wala pa nafully restore ang kuryente.
Suno diri, ang mga balay sa pungsod ang indi tuman ka concrete kaangay sa Pilipinas, gani ini ang sarang lamang madala sang mabaskog nga hangin.
