Magapatigayon sang clearing operation ang Bacolod City Legal Office kaupod sa City Administrator’s Office sa mga sidewalk vendors sa downtown area.
Sa interview kay Bacolod City Legal Officer Atty Romeo Carlos Ting Jr., gin-inspection na nila sang tinalikdan nga semana ang mga vendors bilang warning.
Suno diri, pahalinon ang mga nagabaligya nga indi man miyembro sang vendor’s plaza association nga ginpahanugutan sa area.
Apang paathag sini nga may standard nga size sang stalls nga 1×1 meter lamang, kag kalabanan sa mga nagabayolar sini amo ang mga hinali na lamang nag-ulhot agud magbaligya sa lugar.
Suno kay Ting, nagareklamo ang mga negosyo nga yara sa sulod sang buildings bangod indi na makita ang ila mga balaligyaan tuga sang nagapinagusto nga sidewalk vendors.
Iban sa mga ini ang tuman ka taas sang display kag may-ara man sang malapad ang stalls nga nagahatag kabudlayan para sa mga nagalabay.
Dugang pa nga yara ang kahangawa sa mga nagalabay nga mamalayran inkaso makasagaid kag magkalahulog sang mga baligya.
Ginapanugyan man sa mga ini nga may royda ang mga stalls agud nga mas mahapos ang paghimos sa hapon.
Apang nakit-an nga madamo sang mga sidewalk vendors nga ginabilin nalang ang mga baligya, ginatabunan sang trapal kag ginapadlock lamang.
Suno diri, may mga nagareklamo nga negosyo nga yara sa mga buildings apang sila ang indi man derekta nga makasaway sa mga sidewalk vendors bangod nagapangakig ang mga ini.
Pahanumdom ni Ting nga sa tion nga maghugpong ang mga establishment nga yara sa downtown area sa pagreklamo sa mga pasaway nga sidewalk vendors, mahimo nga tanan pa sa mga ini ang mapahalin sa lugar.
Suno diri, sila ang magapatigayon sang weekly inspection upod sa City Administrator’s Office agud maregulate ang mga sidewalk vendors sa Bacolod City Downtown Area.
