Sirad-an na bwas ang mga pwesto sang mga Manokan Country Vendors.
Sa interview sang Bombo Radyo Bacolod kay City Legal Officer Atty. Romeo Carlos Ting Jr., sang Enero pa kuntani ang turn-over agud masuguran sang SM Prime Holdings Inc. ang renovation apang naghatag sang extension bangod wala pa sang natukod nga temporary location nga masayluhan sang mga tenants.
Apang naglawig na ang extension kag ang ulihi nga deadline ang tubtob kuntani sang Hulyo 5, apang nag-ayo ang mga vendors nga sila ang mahatagan sang 20 ka adlaw nga extension samtang ginahitso ang pagtransfer sang utilities kaangay sang kuryente kag tubig sa temporaryo nga pwesto.
Apang bangod wala gihapon sang bisan isa nga nagpabutyag nga luyag magsaylo sa temporaryo nga pwesto kag wala man sang may naga-asikaso, ginalantaw nga wala gid sang katuyuan ang mga vendors nga magsaylo sa gintalana nga pwesto sa atubang sang terminal hub sang mall.
Kaina sang aga ginpadulungan na nila ang Manokan Country agud pahibaluon ang mga vendors nga tubtob subong nga adlaw na lamang ang ila operasyon.
Wala man sang apprehension kag ang ginakahangawa lamang sang mga ini nga mapan-os ang ila mga baligya.
Bwas saraduhan na ang mga stalls samtang nagrequest naman ang City Government sa Central Negros Electric Cooperative (CENECO) kag Bacolod City Water District (BACIWA) nga utdon na ang electric kag water connections.
Panindugan ni Ting nga ang extension ang ginhatag bilang transition sa pagsaylo sa temporary location, apang bangod wala man sang may nagahulag nga magsaylo, indi naman kinahanglan nga hulaton ang Hulyo 20.
Sa tion nga may mag-ayo nga desidido nga magsaylo sa temporary location, panugyan ni Ting nga si Mayor Alfredo ‘Albee’ Benitez na lamang ang makasabat kun sila ang hatagan pa sang tyansa.
