May mga assignments na ang mga traffic enforcers sa ciudad sang Bacolod kun sa diin nga simbahan magabantay subong nga Semana Santa.
Sa interview sang Bombo Radyo Bacolod kay Bacolod Traffic Authority Office (BTAO) Head Patrick Leonard Lacson, nakaligad palang nga semana sila ang may nakaplano na nga deployment sa Semana Santa tubtob na sa Easter Sunday.
Ginkuha naman nila ang tanan nga mass schedule agud sila ang makapadala sang traffic personnel.
Kahapon, Palm Sunday may mga congestions na sa mga dalanon sa atubang sang simbahan partikular na sa San Sebastian Cathedral.
Suno kay Lacson, ang mga personnel ang magaderiher sang trapiko sa atubang sang mga simbahan kasubong man magahitso sa problema sa parking agud nga wala sang mangin obstruction sa dalan kag magatayuyon ang dalagan sang trapiko.
Wala naman sang day-off sa mga traffic personnels sa kaangay nga mga holidays gani full force ang mga ini kag magapatigayon na lamang sang shifting kag assignments kun sa diin nga area magabantay.
Panawagan ni Lacson sa mga motorista kag mga deboto nga magapadulong sa mga misa nga padayun nga magkooperar sa mga traffic rules.
Aminado man ini nga nagmaayo na ang dalagan sang trapiko sa ciudad sang Bacolod kag ini ang nahimo indi lamang sa effort sang mga traffic enforcers kag City Mayor’s Office kundi bangod sa pagsunod sang mga motorista.
Pahanumdom ni Lacson nga ang maayo nga traffic situation ang makabenepisyo sa tanan, partikular na sa time management kasubong man sa pag-uswag sang ekonomiya bangod malikawan ang pagkadelatar sang mga transaksyon.
