Nagapanindugan ang Bacolod Alliance of Commuters Operators and Drivers Inc. (BACOD) nga sila ang magabalik na sa pagbyahe bwas, apisar sa pamahog nga sila ang pagadakpon.
Madumduman nga natapos na kahapon ang ginhatag nga grace period sa pagbyahe sang mga unconsolidated tarditional jeepneys.
Suno kay BACOD President Rudy Catedral, nagpahayag ang Department of Transportation (DOTr) kag Land Transportation Franchising and Regulatory Board (LTFRB) nga sila ang magadagdag sang show cause order para sa mga unconsolidated traditional jeepneys.
Apang ginalantaw sini nga indi masarangan ang paghatag sang show cause order sa masobra tres mil nga mga drivers kag operators.
Panindugan ni Catedral nga magabalik sa pagbyahe ang masobra 1,500 nga mga unconsolidated jeepneys bwas, agud indi magutman ang ila pamilya.
Apang sa tion nga may dakpon bisan isa lamang sa ila nga miyembro, ginpahayag sini nga balabagan nila ang opisina sang Land Transportation Office (LTO) – Bacolod kag igadeklarar nga holiday sa sulod sang isa ka semana.
Panindugan sini nga 239 lamang ang rehistrado nga nakasulod sa consolidation process, kag ang iban nga nagproseso ang wala sa listahan.
Suno kay Catedral, ginpahayag mismo ni LTFRB Region 6 Officer in Charge Atty. Salvador Altura nga P400 lamang ang balayran sa consolidation process, apang ang sukot sang mga abusado nga kooperatiba ang nagadangat sa P4,000 tubtob P5,000.
