Karun nga nagapadayun ang Russian invasion sa Ukraine, wala natapos sa pagkapot sang armas ang pagpakigbato sang mga Ukranians batok sa mga Russians.
Isa diri sa nakita nga pamaagi sang pila ka mga Ukranians sailors, amo ang pagbalabag sa mga superyachts nga ginapanag-ihayan sang mga dalagko nga personalidad sa Russia.
Nahibaluan nga duha ka mga superyachts nga naangot sa Russian oligarch kag nagapanag-iya sa Chelsea FC nga si Roman Abramovich ang nareport nga nagdungka sa kadagatan sang Turkey.
Apisar nga wala sang gindagdag nga sanction batok sa Russia sa nasambit nga baybayon, ginsugata gihapon ang mga ini sang protesta.
Nahibaluan nga ang Solaris yacht ang nagbiya sa Montenegro sang tinalikdan nga senimanakag nagbyahe padulong sa southeast tubtob sa Turkey, sa paglikaw sini sa European waters tubtob sa makadangat sa port city sang Bodrum Marso 21.
Sa nasambit nga lugar ang 460-foot nga yate ang ginsugata sang gamay nga grupo sang pamatan-on nga mga Ukranian sailors nga nagtinguha nga balabagan ang mga ini agud nga indi makadungka sa pier.
Makita naman sa mga video footage ang mga tawo gikan sa gamay nga sakayan nga nagawaragwag sang Ukrainian flags kadungan sang pagsinggitan sang “no war in Ukraine”.
May-ara man sang mga nakasakay sa baruto nga nagatabog sa tuman ka dako nga yate.
Ang mga ini ang natukiban nga mga estudyante sa Odesa Children and Youth Sailing School, nga mas kilala sa tawag nga Optimist Sailing Club.
Ginapahayag nga ang team ang nagbiya sa Ukraine antes paman gin-invade sang Russia ang pungsod agud nga magcompete sa tuigan nga kompetisyon sa Turkey.
Pahayag ni Coach Paulo Dontsov, nga desisyon mismo sang tanan sa team ang pagprotesta kag tinutuyo sang mga ini nga indi mahatagan sang kahilwayan ang mga nagasuporta sa gyera.
Pahayag sini nag gilayon man nga nag-abot ang Turkish coast guard kag ginhingyo sa mga magagmay nga sakayan nga magpalayo nalang.
Pahayag sang coach nga mahapos lang estoryahon ang mga estudyante kag luyag man sang mga ini nga buhaton ang pagprotesta nga nagasunod gihapon sa pagsulundan sang ila pungsod.
Nahibaluan nga ang mga nagprotesta ang temporaryo naman nga gindetain matapos ang insidente samtang ginapatihan nga indi sakay sang yate si Abramovich sang natabo ang insidente.
Ang ikaduha nga superyacht nga Eclipse nga linked kay Abramovich ang nag-abot naman sa resort town sang Marmaris, Turkey sang nakaligad nga Martes.
Ginalantaw nga plano ni Abramovich kag iban nga manggaranon sa Russia nga mag-invest sa Turkey sa pihak sa nagatangkas nga sanctions gikan sa Western Countries.
Apisar nga gincriticize man sang Turkey ang invasion sang Russia sa Ukraine, wala ang mga ini nagdagdag sang sanctions sa panindugan nga ini ang counterproductive.
