BACOLOD CITY – Ginpaanggid ni Environment Sec. Gina Lopez sa “hell” ukon impyerno ang open pit ukon buho sa kabukiran sang ciudad sang Sipalay kun sa diin may nagapadayon nga mining operations.
Ini ang kasunod sang ginhimo nga ocular inspection sang tiglikom kaupod ang iban pa nga empleyado sang Department of Environment and Natural Resources (DENR) sa ibabaw sang Maricalum Mining Corporation sa nasambit nga ciudad.
Sa exclusive interview sang Bombo Radyo, ginpahayag ni Sec. Lopez nga tuman kadaku sang gindulot nga kahalitan sang pagmina sa kabukiran kag nalakip na diri ang pagka-acidic sang duta kag apat ka beses nga pagluntad sang mining spill.
Suno sa iya, magapaguwa ini sang show cause order batok sa Maricalum Mining kag nakahanda ini nga suspendiron ang Mineral Production Sharing Agreement (MPSA) sini.
Paathag ni Sec. Lopez nga ang mining firms ang makabulig lamang sa komunidad samtang yara ini sa lugar apang kun maubos na ang mineral kag wala na ini sang kapuslanan, pagabayaan man nila nga nagatiwangwang ang kabukiran kag magaagwanta na ang mga tawo sa lugar sang mga malaot nga epekto sang pagmina tubtob sa katapusan.
Ginpasiguro naman ni Lopez nga pagabuligan sini nga makabangon ang ciudad sang Sipalay gikan sa mga malaot nga epekto sang pagmina sa nasambit nga lugar
Ginpahayag ni Sec. Lopez nga nakita sini ang tuman nga katahom sang ciudad sang Sipalay sang magpatigayon ini sang ocular inspection sa kahawaan upod sa iban pa nga opisyal sang DENR kahapon nga adlaw.
Paathag sang tiglikom, indi matuod nga kun mineralized ang duta sa isa ka lugar, pagmina na lamang ang sarang nga mahimo bangud madamo sang iban pa nga tikang agud mapaumwad ang amo nga lugar.
Ginhalimbawa sini nga may yara siya sang mga abyan nga nagapanguma sa mineralized land gamit ang moderno nga teknolohiya.
Suno sa iya, ang turismo sa ciudad sang Sipalay ang makasarang na agud mapasanyog ang ciudad kag indi na kinahanglan pa ang pagmina bangud sa baylo nga kaayuhan, kalautan lamang ang madala sini rason nga dapat na ini nga mapauntat.
