Magapatigayon sang ground-penetrating radar (GPR) survey ang Mines and Geosciences Bureau sa kadalumon kag kasarangkaron sang paglitik kag pag-usmod sang duta sa Camp Valdez, Barangay Mambaroto, Sipalay City, Negros Occidental.
Suno kay Benigno Cesar Espejo, Director sang MGB Negros Island Region sa inisyal nga assessment sang staff sang ginpadulungan nila ang lugar makabig nga isa ka sink hole collapse ang natabo.
Ang sinkhole collapse ang nagakatabo kun may yara sang limestone sa idalom sang duta.
Paathag ni Espejo, may portion sang mountain slope ukon banglid nga may presensiya sang limestone kag ini ang soluble ukon sarang matunaw sa dalayon nga pag-ilig sang tubig.
Sa karon, sarang pa maagyan ang dalan malapit sa naglitik nga duta apang plano nga i-reroute ang mga dalagku kag mabug-at nga mga salakyan agud malikawan ang dugang nga pagtay-og kag pag-usmod sang duta sa lugar.
Nahibaluan nga bangud sang pag-usmod sang duta, natabunan ang kanal sa higad sang highway sa nasambit nga lugar.
