Ginalantaw sang Bacolod Police Station 7 ang posibilidad nga mahimo nasal-an lang ang 14-anyos nga si Joel Bayotas gani siya ang ginpatay sang indi magnubo lima ka mga lalaki sa Abada Escay, Barangay Vista Alegre kagab-i.
Sa interview sang Bombo Radyo kay Police Capt. Elmer Bonilla, station commander sang Bacolod Police Station 7, ginpahayag sang mga nakasaksi nga may persona sa lugar nga ginaalegar engaged sa illegal drug activity kag may kaso man nga murder nga mahimo amo ang ginapangita sang mga suspetsado.
Ang sulterito nga si Bayotas ang related man sa ginapangita sang mga suspetsado.
Suno kay Bonilla, mahimo nga mistaken identity ang natabo.
Apang sa pagtsekyar sa record ni Bayotas, naangot ini sa isa ka gang nga may away sa isa ka pamilya sa lugar sadto.
Isa man ini sa mga anggulo nga ginalantaw sang Bacolod Police Station 7 kun ngaa ginpatay ang biktima.
Ginahibalo sang Police Station 7 kun ano ang ugat sang inaway apang nagagwa nga nagsugod ini sa inaway sa basketball nga nag-intra ang mga ginikanan.
Suno sa mga opisyales sang barangay, may settlement na sadto sa magtimbang nga kampo apang wala nahusayan.
Natalana naman nga magpagwa ang Lupon ng Barangay sang certificate to file action apang ginpatay na si Bayotas.
Ginahibalo man sang Bacolod Police Station 7 kun ano nga gang ang ginaupdan sang biktima nga mahimo rason nga siya ang ginhingabot.
