Nadakpan na ang bana nga nagpatay sa iya misis sa atubang mismo sang ila nga mga kabataan sa banwa sang Cauayan diri sa probinsya sang Negros Occidental.
Nahibaluan nga duha na ka tuig nga nagatrabaho sa Manila ang 50-anyos nga si Presila Mendiona kag nagpauli ini sa ila puluy-an sa Purok 1, Barangay Yao-yao sang Disyembre 19 agud magproseso para sa national ID.
Apang nakibot ini nga wala napakaayo ang ila balay kag halos indi na matulugan apisar masami ini nagapadala sang kwarta sa iya bana nga si Eduardo.
Bangud sini, nagbaisay ang mag-asawa tubtub gingutrab sang mister ang liog sang iya misis gamit ang flaminco sa atubang sang duha nila ka kabataan nga lunsay menor de edad.
Ginhingagaw pa ini dala sa ospital apang gindeklarar nga dead on arrival.
Suno kay P/Major Lowell Garinganao, hepe sang Cauayan Municipal Police Station, may mga nakahatag sang impormasyon sa mga barangay officials nga nagapanago sa nabukid nga bahin sang barangay si Eduardo.
Bangud nga anay barangay tanod ang suspetsado, madamo ang nakakilala sa iya.
Bangud diri, ginpatigayon kahapon sang hapon ang hot pursuit operation sang gintingob nga pwersa sang 15th Infantry Batallion kag Cauayan Municipal Police Station kun sa diin tatlo ka grupo ang nagtunga-tunga agud nga makordon ang suspetsado kag madakpan ini.
Suno kay Garinganao, nagpalanulom ang panan-awan sang suspetsado sang ginpamangkot ini kun ngaa nahimo niya ang krimen.
