Dakop ang katapo sang Communist Party of the Philippines – New People’s Army (CPP-NPA) matapos nga gin-serbehan sang warrant of arrest sa kaso nga frustrated murder.
Gindakop sang gintingob nga pwersa sang Hinobaan Municipal Police Station, Provincial Intelligence Unit sang NOCPPO kag 15th Infantry Battalion sang Philippine Army ang suspetsado nga si Adrian Omilig alyas Tortor kag alyas Niko, 23-anyos, sa Purok 6, Maote, Barangay Bulwangan, Hinobaan alas-10:50 sang aga sang Huwebes.
Ang suspetsado ang gin-aresto pinaagi sa warrant of arrest nga gin-issue ni Kabankalan City Regional Trial Court (RTC) Branch 61 Judge Rodney Magbanua sadtong Pebrero 28, 2022.
Suno kay P/Capt Ramel Bustamante, hepe sa Hinobaan Municipal Police Station, ang kaso ni Omilig ang may kaangtanan sa engkwentro sang makawala nga grupo batok sa 15th IB nga nagluntad nakaligad nga tuig kun sa diin may yara sang nasamaran nga suldado.
Sa karun ginatumod pa kun ano ang posisyon ni Omilig sa rebelde nga grupo kag kun ini ang aktibo pa nga miyembro.
Ang suspetsado ang gintanyagan sang piyansa nga P120,000 para sa temporaryo nga kahilwayan.
