Ginapakamaayo sang Officer in Charge sang Provincial Environment and Natural Resources Office (PENRO) – Negros Occidental nga wala sang dako nga kahalitan sa marine life ang nagluntad nga molasses spill sa Sagay Marine Reserve.
Sa interview sang Bombo Radyo Bacolod kay Engr. Joan Nathaniel Gerangaya, gintsekyar na sang Bantay Dagat kag Philippine Coast Guard ang idalom sang Mary Queen of Charity motor tanker kag naseguro nga wala sang leakage ukon buslot sa barko.
Gani ang ginalantaw nila nga rasun sa leakage amo ang indi husto nga pagtransfer sang molasses gikan sa truck sang Lopez Sugar Central pasulod sa bodega ukon chamber sang motor tanker.
Paathag sini nga may tarog lamang nga ginagamit sa pagtransfer kag bangod gab-i ini ginpatigayon, mahimo nga ini ang wala masentro kag nag-ula sa dagat.
Gin-athag man ni Gerangaya nga halos isa ka truck ang nagtagas nga mollasses.
Paathag sini nga ang delikado lamang amo ang una nga tion sang pagka-ula sa dagat kun sa diin lapuyot pa ang molasses nga mahimo makapatay sang marine life.
Apang bangod ang molassess ang isa man ka biodegradable materials, nga masami ginagamit bilang feeds kag organic fertilizer, ini ang wala sang dako nga kahalitan sa baylo magaserbe pa nga pagkaon sang marine life.
Ginpasalig man sini nga indi na kinahanglan nga icontain ang area bangod madasig man nga nadillute kag sa karun balik na sa normal ang tubig sa palibot sang Sagay Port.
Kahapon pa lamang nakakuha naman sang water sample ang Environmental Management Bureau kag Sagay City Government agud matsekyar kag makomparar ang findings sa mahimo epekto sa protected area.
Samtang maga-atubangay pa ang management sang Sagay Marine Reserve kag representative sang barko kag sugar central, nga mahimo mangatubang sang penalidad.
Sarang naman nga makalayag ang motor tanker bangod wala man sang nakita nga kakulangan sa papelis sang barko ang Philippine Coast Guard.
