BACOLOD CITY — Matapos ang tatlo katuig nga pagdumili, liwat na nga ginbuksan ang Mt. Kanlaon Natural Park para sa lokal kag dumuluong nga mga turista nga luyag mag-trekking.
Suno kay Mt. Kanlaon Deputy Park Superintendent Raul Cagayawan, sumugod sadtong Hulyo uno, liwat na nga ginbuksan ang bulkan para sa mga luyag magsaka sini matapos nga ginbatak na ang Alert Level One nga gindeklarar sang Phivolcs bangud sang mga aktibidad sang Kanlaon.
Suno kay Cagayawan, madamo na sa karon ang nagapadala sang application agud makasaka sa bulkan apang ginpabutyag sini nga kinahanglan nila nga limitahan sa napulo lamang ka mga trekkers ang kada grupo nga magasaka.
Ini bangud matapos ang ginpatigayon nga trail assessment sadtong Hunyo, nahisayran nga madamo nga basura ang ginabilin sang mga mountaineers kun sa diin kalabanan ang plastic bottles.
Katuyuan man sang assessment ang pagsiguro nga luwas para sa mga turista ang trail ukon ang alagyan pasaka sang bulkan.
Samtang, ginpabutyag ni Cagayawan nga ang trekking pahanugutan lamang tubtob sa Septyembre bangud liwat naman sila magapatigayon sang assessment sa epekto sang kadamuon sang mga nagasaka sa bulkan.
