Padayon pa ang imbestigasyon sang Murcia Municipal Police Station sa nagluntad nga pagluthang sa magpakaisa nga lalaki samtang nagasakay sa motorsiklo sa Prk Mirasol, Brgy Caliban, Murcia, Negros Occidental, sang Domingo, Marso 29 sang gab-i.
Ginkilala ang mga biktima nga sanday alyas Aljon, 27 anyos, kag alyas Nico, 30 anyos lunsay mga residente sang Sitio Antawan, Barangay Canlandog, Murcia.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, nagabacktracking sila karun bangud wala sang CCTV sa lugar kag wala sang mga pamalay.
Ang mga biktima ang wala man sang record sa Barangay.
Nagpatigayon man ang kapulisan sang Murcia sang background checking sa mga biktima.
Wala pa ang mga ini sang natumod nga posible motibo sa krimen.
Madumduman nga nagabyahe papauli ang duha sakay sa motorsiklo matapos nga magpamiyesta apang paglab-ot sa Purok Mirasol, hinali lang sila nga ginpaarakan sang luthang.
Natigayon nga makapalagyo si alyas Nico samtang nag-agom naman sang pila ka igo sa lawas si alyas Aljon nga nagresulta sa kamatayon sini.
Wala naman nahibaloan kun sin-o ang mga suspek nga nagluthang sa magpakaisa.
