Madamo na gid sang naga-trending subong nga mga ambahanon nga human sa Artificial Intelligence ukon AI gani ginpakigbahin sang duha ka music enthusiast kun ano ang ila nga paglantaw sa lapnagon nga Artificial Intelligence ukon AI.
Sa interview sang Bombo Radyo Bacolod kay Gil Gemino, DJ/Music Producer, CEO ka LSS Music, kag kay Ed Miraflor, Singer-Song writer sa Bacolod City, nagapati ang duha nga ang AI isa ka tool lamang nga dapat ginagamit agud mapanami ang ubra apang magapabilin gihapon ang pagpangamot sa pag-ubra ilabi na sa musika.
Suno kay Gemino, ang musika ang masami nagabag-o sa paglakat sang panahon samtang naga-adjust man ang mga composer kag musikero.
Suno diri, mahimo nga indi dapat magkabalaka ang mga composer sa AI bangud isa lamang ini ka tool nga napuno sang mga data kag wala ini sang ikasarang nga magpakita sang emosyon nga kaangay sang tawo.
Suno naman kay Gemino, yara na kita subong sa AI Generation kun sa diin dako na gid ang parte sang AI sa tagsa nga kabuhi sang tawo.
Suno diri, naga-ubra ini sa isa ka data company bilang AI anotator kun sa diin ang iya nga ubra amo ang quality control check, kag base sa iya nga naeksperyensyahan sa iya nga ubra, nakita niya nga ang AI ang nagakolekta lamang sang mga available nga data sa internet kag amo yadto ang ginakwaan sang base agud makahimo sang kanta.
Samtang pahayag ni Miraflor, ang AI ang kaangay lamang sang isa ka salakyan, indi ini maga-andar kun wala sang may ma-drive kag ang driver gihapon ang magadumala sang manobela.
Dugang pa niya, indi kinahanglan nga perpekto ang isa ka ambahanon, ang importante may yara ini sang matuod-tuod nga emosyon humalin sa tawo.
