Nagwangal ang Muslim community sa ciudad sang Bacolod sa tuman ka brutal nga pagpatay sa negosyante nga una gin-abduct kag nasapwan na lamang sa Purok Kasanag, Brgy. Mandalagan, nagligad nga adlaw.
Sa interview sang Bombo Radyo Bacolod kay Monib Cali, nga isa sa mga kauupdanan sang biktima nga si Ontao Sacar kag naghimos sang bangkay sini, halos indi nila mabaton ang gindangatan sang ila utod nga Muslim sa kamot sang mga suspetsado.
Antes pa man gindala sa Marawi City ang bangkay ni Sacar, ginlimpyuhan anay ini sang iya mga utod nga Muslim sa Islamic Center sa Brgy. 31 kag diri nakita ni Cali ang mga pilas sini.
May yara sang tatlo ka pilas si Sacar sa ulo nga igo sang armas kun sa diin ang isa ka bala ang naglapos sa iya guya, ang isa sa liog samtang ang isa pa ka bala ang wala naglapos.
Nadiskubrehan man ni Cali nga wala na ang isa ka eyeball ni Sacar, rason sang ila pagwangal sang tuman ka brutal nga pagpatay diri.
Magluwas diri, nagahihibun-ot pa si Cali sa pagsulat-sulat sang mga suspetsado sa bangkay sang biktima kaangay na lamang sang mga tinaga nga “I love drugs” kag pagkasapo man sang placard nga may nasulat nga “huwag tularan bigtime pusher ako ”.
Pamangkot ni Cali, kun matuod nga bigtime pusher si Sacar, nga-a human lang sa gihapon sa kahoy ang iya nga balay.
