Patay na sang masapwan ang Muslim nga negosyante nga gin-abduct sang duha ka mga lalaki sa syudad sang Bacolod kagab-i.
Nahibaluan nga ang biktima nga si Ontao Sacar, 67 anyos kag tumandok sang Mindanao apang nagapuyo karun sa Barangay 11, Bacolod City, ang gin-abduct sang mga suspetsado nga nagasakay sang pribado nga salakyan sa Mambuloc, Barangay 10, pasado alas-9:00 kagab-i.
Negosyante nga Muslim sa Bacolod, gin-alegar gin-abduct sang wala nakilal-an nga mga suspetsado
Papauli na kuntani ang biktima halin sa iya baligyaan sa mall sa Gatuslao Street upod ang iya nga asawa sang ginlambatan sang mga suspetsado nga nagasakay sa pula nga SUV kag pilit nga ginpasakay sa salakyan.
Suno sa asawa sang biktima, may yara sang high powered firearms ang duha ka suspetsado nga nagasuksok sang bonnet kag jacket.
Alas-6:00 kaina sang aga, nasapwan ang bangkay sang biktima sa higad sang dalan sa likod sang mall sa Purok Kasanag, Barangay Mandalagan.
Ginputos sang packing tape ang baba kag guya sang biktima, may nakasulat nga “I love drugs” sa iya nga tiyan kag may smiley pa kag nakita man sa iya tupad ang placard nga “Huwag tularan bigtime pusher ako”.
Suno kay Police Major Ruel Culanag, commander sang Bacolod City Police Station 3, posible nga sa iban nga lugar ginpatay ang biktima kag ginbilin lang sa lugar bangud wala sang lupok nga nabatian ang mga residente malapit diri.
Ang negosyante ang nagapanag-iya sang balaligyaan sang cellphone accessories sa isa ka mall sa Bacolod.
