BACOLOD CITY — Balik na sa normal ang pangginawi sang mga pumuluyo sa Barangay Inayawan, banwa sang Cauayan kasunod sang report nga may nagdungka nga armado nga mga lalaki sa lugar, Biyernes Santo sang gab-i.
Pasado las 9:00 sa gab-i sang nagkabalaka kag wala nakatulog ang pila ka mga residente sa Barangay Inayawan matapos nakit-an ni Jill Situna nga may napulo ka mga lalaki nga nagagamit sang flashlight, nagasubay sa higad sang suba kag nagtaklad sa direksyon nga padulong sa nabukid nga parte sang banwa.
Sa exclusive interview sang Bombo Radyo kay Situna, naga-umbilay sang backpack ang pila ka mga lalaki apang indi niya makita sang klaro ang nawong sang mga ini bangud madulom.
Nagbatyag sang kakulba ang mga residente bangud may sakayan-pandagat nga nastranded malapit sa higad sang baybay kag bangud man sa ila nabalitaan nga natabo sa Bohol sang nagligad nga semana.
Bangud sini, ila nga ginbantayan ang bangka tubtub mag-aga agud mahibaluan kun sin-o ang mga sakay sini.
Magluwas sa iya, may isa pa gid ka residente ang nagpahayag nga nakita mismo sang mga pumuluyo nga may armado nga mga tawo sa ila lugar.
Suno kay Rommy Tindog, nasugata sang mga residente nga nagpauli halin sa simbahan ang mga armed men gani sila ang natingala bangud indi man suldado ang mga ini.
Gilayon sila nga nagpahibalo sa mga opisyal sang barangay kag ginmandu sang ila punong barangay nga bantayan ang sakayan tubtub mag-aga.
Sa pagpangusisa sang news team sang Bombo Radyo sa lugar, ang 74-anyos nga si Frank Vlasquez, isa ka retirado halin sa Alaska, United States of America apang naga-istar na sa Barangay Sacsac sa banwa sang Bacong sa probinsya sang Negros Oriental ang nagasakay diri.
Kaupod sang Americano ang 11-anyos sini nga bata nga babayi.
Ginsaysay ni Frank nga naaberya ang makina sang ila pumpboat matapos nga nakabunggo sa dako nga bato.
Suno diri, halos 13 oras sila nga nagtinir sa sakayan antes nakapahigad bangud wala sang may nagpalapit agud nga magbulig ilabi na nga gab-i na.
Gin-ako sini nga indi na siya makakita kun madulom gani nagsalig na lamang siya sa iya anak.
Ang mga dumuluong ang halin sa banwa sang Bacong, nagpadulong sa San Francisco, Santa Catalina, Negros Oriental antes naglayag padulong sa Sipalay tubtub nga nakalab-ot sa Cauayan para sa isa ka holiday trip gamit ang pumboat nga si Frank man mismo ang naghimo.
