Nakuhaan sang P782,000 nga balor sang suspected shabu ang ginaalegar kawatan sa ciudad sang Bacolod sa drug buybust operation nga ginpatigayon sang City Drug Enforcement Unit sa Purok Mapalaron, Brgy. 30, Bacolod City alas-4:54 kahapon sang hapon.
Ang subject person amo si Joseph Angelo Bayag, 31-anyos, residente sang Zone 3, Brgy Boulevard, Iloilo City apang temporaryo nga nagapuyo sa Purok Malaparon, Barangay 30, Bacolod City.
Sa interview sang Bombo Radyo Bacolod kay Police Lt Col. Antonio Benitez Jr., pinuno sang City Drug Enforcement Unit sang Bacolod City Police Office (BCPO-CDEU), si Bayag ang makaduha na nga nadakpan sa drug buybust operation sa Iloilo kag may anom ka kaso sa pagpangawat ukon robbery.
Sang makagwa sa prisuhan bangod sa pagbaligya sang illegal nga droga, ini ang nagtabok sa Bacolod City sa iya Bacolodnon nga live-in partner.
Namonitor si Bayag bangod ini ang ginatudlo nga source sang pila ka mga nagkaladakpan nga street level individual.
May nadakpan man sila sadto sa Iloilo nga nagpahayag nga si Bayag man ang ginakuhaan sang supply.
Kahapon, nakuha sa iya paghinakop ang anum tanan ka heat sealed transparent plastic sachet sang suspected shabu, duha ka knot-tied transparent plastic bag nga naga-unod sang suspected shabu, P1,000 bill kag iban pa nga mga non-drug items.
Ang nakumpiskar nga illegal nga druga ang may kabug-aton nga 115 grams.
Sa karun nakahunong na ini kag natalana nga magpangatubang sang nagakaigo nga kaso.
