BACOLOD CITY – Kumpirmado nga mga miyembro sang New People’s Army ang nag-ambush sa utod sang anay punong barangay kag driver sini sa banwa sang Calatrava, Negros Occidental kahapon sang aga.
Patay sa ambush sa Barangay Minapasok sanday Norberto Lumayno, isa ka planter kag Danilo Braga, pareho nga residente sang nasambit nga lugar kag gin-ambush samtang padulong sa plantasyon sang tubo ni Lumayno kun sa diin puno sang buho nga ginlapsan sang bala ang salakyan.
Sa interview sang Bombo Radyo kay Capt. Eduardo Precioso, civil military officer sang 303rd Infantry Brigade sang Philippine Army, naka-engkwentro sang mga myembro sang 62nd Infantry Battalion ang NPA fighters sa katupad nga Barangay Cambayobo, pila ka minutos ang nakaligad matapos ang ambush.
Narekober sa encounter site ang mga armas, hand grenade kag bandera sang NPA samtang ginahibalo pa kun may pilason sa mga rebelde.
Apang suno kay Precioso, ginahibalo pa kun ano nga grupo sang mga rebelde sa Negros ang responsable sa ambush.
Natalana nga igapaidalom sang Scene of the Crime Operatives sa ballistic examination ang mga bala nga narekober sa crime scene, subong man, magapatigayon sang bullet trajectory examination sa salakyan sang biktima.
Suno kay Police C/Insp. John Joel Batusbatusan, hepe sang Calatrava Municipal Police Station, nakuha sa ginluntaran sang ambush ang fired bullet sang M16, M14, AK-47, M203 kag .45 caliber pistol.
