May nasapwan nga nagaka-agnas nga bangkay sa Hacienda Salapid, Barangay Inolingan, Moises Padilla kaina sang aga.
Sa interview sang Bombo Radyo Bacolod kay Reynald Horegue, head sang Moises Padilla Municipal Disaster Risk Reduction and Management Council, sang masapwan sang mga pumuluyo ang bangkay ini ang gilayon nga nagreport sa Barangay Officials, nga amo naman ang nagcontact sa ila.
Ini ang ginkadtuan man gilayon sang Moises Padilla CDRRMO personnel upod sa kapulisan.
Suno kay Horegue, yara na sa advance stage of decomposition ang bangkay kag halos bagol kag kalabera na lamang ang biktima.
Ini ang may panapton nga tshirt nga puti nga nagsaka na sa iya abaga, kag may shorts nga dotted nga itom kag puti.
Ini ang gilayon man nila nga ginhimos kag gindala sa temporary holding area sa Moises Padilla Public Cemetery.
Nagrequest pa ang mga ini nga mapaidalom sa forensic examination ang bangkay.
Panawagan ni Horegue sa mga may missing pa nga himata sang maglaslas ang Bagyo TINO nga makig-angot sa CDRRMO ukon sa Moises Padilla Municipal Police Station sa pagkumpirmar kun himata nila ang nasapwan.
Ini ang ika-27 na nga bangkay nga naretrieve sa banwa humalin sang mag-igo ang Bagyo TINO.
