Magapangatubang sa kaso nga homicide in relation to Republic Act No. 7610 ukon Special Protection of Children Against Abuse, Exploitation, and Discrimination Act ang former member sang Special Civilian Armed Forces Geographical Unit Active Auxiliary sang 79th Infantry Battalion kag anay traffic enforcer nga nanglampos sang isa ka litro nga botelya sang makahulubog nga ilimnon sa 13-anyos nga lalaki nga gintunaan sang kamatayon sini sa Brgy Paitan, Escalante City alas- 9:00 sang gab-i sang Martes.
Ginkilala ang suspect nga si alyas “Toto”, 29-anyos, lalaki, single kag residente sang Sitio Proper sa nasambit nga barangay.
Sa interview sang Bombo Radyo kay Police Lt Col Florendo Fajardo, hepe sang Escalante City Police Station, nagtambong sa vigil ang biktima sang nag-abot si Toto nga hubog kag bitbit sini ang botelya sang Red Horse nga wala na sang unod.
Suno diri, ginsugo ni Toto ang biktima apang nagpamalibad ini amo nga ginlamposan sini sang botelya ang ulo sang bata.
Suno kay Fajardo, gindala sa ospital ang biktima nga nag-agom sang dako nga bukol sa ulo apang pagkasunod nga adlaw nagsuka ini kag ginbawian sang kabuhi.
Nahimo naman nga nadakop si Toto sa pursuit operation sa sitio Nangka, barangay Jonobjonob sa nasambit nga ciudad.
Nahibaloan nga former member sang Special Civilian Armed Forces Geographical Unit Active Auxiliary sang 79th Infantry Battalion kag anay traffic enforcer si Toto apang narelieved bangod masami ini nga magmaoy.
