Padayon ang imbestigasyon sang Binalbagan Municipal Police Station sa pagtumod sa suspek nga nagpatay sa anay miyembro sang Revolutionary Proletarian Army (RPA) sa Purok Vanda, Barangay Santol, Binalbagan, Negros Occidental, sang Martes, alas- 8:30 sang gab-i.
Ang biktima ang ginkilala nga si Joseph Agustin, 38 anyos, manug-uling, kag anay RPA kag residente sang nasambit nga lugar.
Sa interview sang Bombo Radyo Bacolod kay Police Captain Joelan Vinson, hepe sang Binalbagan Municipal Police Station, papauli na kuntani si Agustin sang ginluthang ini sang suspek.
Nag-agom sang pila ka igo sang bala si Agustin nga gintunaan sang iya kamatayon.
Suno kay Vinson, bisan gin-ako sang New Peoples Army nga sila ang nagpatay kay Agustin mapatigayon sa gihapon sang imbestigasyon ang kapulisan agud matumod ang nagpatay sa anay RPA.
Pahayag sini, nagapangita na sila sang mahimo nga nakawitness sa natabo para makilal-an ang unidentified suspect.
