Sa pihak sang kapigaduhon kag kabudlay sang sitwasyon sa karun, may yara sa gihapon nga mga tawo nga nagapili sang paghimo sang insakto.
Kaangay sang isa ka airport cleaner nga nagahimo sang iya ulubrahon sa departure area sang Ninoy Aquino International Airport Terminal 3 sang Hwebes sang nasilhigan sini ang mahigko nga medyas nga nagaunodsang dollar bills nga nagabalor sang kapin P1 million.
Ang cleaner ang ginkilala kay Rosalinda Celero, sa NAIA, ang nakasilhig sang medyas sa idalom sang mga bangko nga ginagamit sang mga pasahero sa pagsuksok liwat sang ila nga mga sapatos.
Apang wala sini namutikan ang nagabulto nga 202 ka bilog nga dollar bills nga nakasulod sa medyas tubtob nga yara na ini sa sulod sang dustpan.
Sang gintsekyar niya ini, nadiskubrehan niya ang dollar bills sa nagkalain-lain nga kantidad.
Gilayon nga gindala ni Celero ang medyas sa NAIA T3 lost and found section, kag nagpatigayon sang inventory sang recovered items.
Ginabanta nga P1 million ang balor sang nakita nga dollar bills.
Ginareview naman sang Manila International Airport Authority ang CCTV footage agud nga matumod ang tag-iya sang medyas.
Indi pa maathag sa karun kun paano nahulog sang wala makilala nga pasahero sa airport security X-ray nga wala nadetect ang kwarta.
Sa idalom sang Bangko Sentral regulations, ang pasahero ang ginapahanugutan nga magdala sang maximum sang $10,000 sa ila hand-carry luggage.
