Hugot ang pagpamatok sang National Citizens’ Movement for Free Elections (NAMFREL) sa extension sang termino sang mga Barangay kag Sangguniang Kabataan officials.
Sa interview sang Bombo Radyo Bacolod kay NAMFREL Secretary General Eric Jude Alvia, may halos anom tubtob pito ka hagna na sa House of Representatives nga nagaduso sang pagpostpone sang November 2 Elections, apang ini ang gindugangan pa sang Senate Bill nga ginduso ni Senator Francis “Chiz” Escudero nga nagatuyo nga palawigon ang termino sang mga Brgy kag SK officials sa 2028.
Pahanumdom sini nga makaduha na nga mapostpone ang eleksyon kag ang Korte Suprema ang nagpagwa naman sang desisyon nga batok sa dugang nga postponement.
Indi man sini mahangpan ang panindugan nga ire-allign ang billion pesos nga budget sa iban nga programa karun nga yara sa State of National Emergency ang pungsod.
Ang plano ang ginpaanggid ni Alvia sa pagkuha sang pondo sang Philippine Health Insurance, Inc. (PhilHealth) sadto, gani panindugan sini nga indi na paghilabtan ang nakapain nga pondo.
Dugang pa sini nga ang extension sang termino ang paglapas na sa tawhanon nga kinamatarong sang mga Pilipino sa pagpili sang leader.
Nagakahangawa ini nga kun madayun ang plano nga mangin 5-years term na ang Barangay kag SK officials, mangin patronage style na ang pamulitika, kun sa diin hatagan sang pabor sang mga opisyales nga ginpalawig sa serbisyo ang mga nagboto pabor sa hagna.
Madula man suno diri ang accountability, bangod para sa mga ini sila ang nagpabilin sa pwesto bangod sa extension kag indi na bangod ginboto sang tawo.
Nagapati ang NAMFREL nga ang pagduso sang extension sang termino sang Brgy kag SK officials ang pamaagi sang mga magapapili sa 2028 National Elections agud masecure ang ila pwesto.
Ini bangod kun madayun ang eleksyon, mahimo magbag-o na ang mga opisyales kag madula na ang mga ginsagod-sagod sang mga yara sa national positions, gani sila ang mapilitan nga maggastos liwat sang dako agud makuha ang suporta sang mga bag-o nga opisyal.
Sa baylo kun ma-extend ang termino, sila ang may gamot na ukon investment sa mga yara sa pwesto sa Barangay.
