Nadakpan sa Kabankalan City ang carnapper nga nagtuyo magtaban sang 10-wheeler truck nga ginakargahan sang tubo gikan sa Lopez transloading sa Prk Stop, Brgy Blumentritt, Murcia, Negros Occidental.
Ang suspect ang ginkilala nga si Alyas Chong, 32 anyos, single, wala sang trabaho kag residente sang Prk Gemilina, Brgy. E Lopez, Silay City; samtang ang tag-iya sang Isuzu 10-wheeler truck ang ginkilala nga si Alyas Franklin, 39 anyos, single, residente sang Brgy Talotog, Murcia.
Sa interview sang Bombo Radyo Bacolod kay Police Captain Honey Labaro, hepe sang Murcia Municipal Police Station, ang carnapping incident ang natabo sang Pebrero 9 kapin alas-3:00 sang hapon, apang nareport sa kapulisan sang Pebrero 10 na.
Suno diri, gilayon sila nga nagpagwa sang flash alarm, tubtob nga natumod nga yara sa Prk Sunshine, Brgy. Salong, Kabankalan City, Negros Occidental ang salakyan.
Gilayon man nga nagkoordinar ang Murcia Municipal Police Station sa iban nga law enforcement unit kalakip na sa Kabankalan City Police Station, Regional Mobile Force Battalion – Negros Island Region kag 15th Infantry Battalion.
Naaresto si Chong kag narecover na ang ginkawat sini nga truck, kasubong man ang gamit sini nga motorsiklo.
Panugyan ni Labaro sa luyag magtsekyar kun ila ang motorsiklo, nga magdangop lamang sa Murcia Municipal Police Station.
