Nag-overheat nga electric fan ang ginalantaw sang Bacolod Fire Station nga gintunaan sang kalayo nga nagluntad nga sunog sa isa ka balay sa Circumferential Road sa Barangay Taculing ciudad sang Bacolod, sang Miyerkules, Agosto 7.
Sa interview sang Bombo Radyo Bacolod kay Bacolod City Fire Marshal Fire Superitendent Jenny Mae Masip, suno sa nasunugan, yara ini sa balkonahe sang balay sang nabatian niya ang nagarinagamak sa kwarto sini gani ginkadtuan sini ang kwarto.
Suno kay Masip, ginpahayag sang nasunugan nga indi sa naoverheat nga electric fan ang ginhalinan sang kalayo nga nagtuga sang sunog bangud sang pagbukas sini sang kwarto wala sang kalayo sang electric fan.
Apang panindugan sang fire marshal nga sa ginatudlo nga ginhalinan sang kalayo ang wala sang source sang ignition kag ini ang nakita sa makina sang electric fan.
Ang electric fan ang nakasaksak sa extension wire nga nakasaksak man sa socket sa ding ding.
Duha ka electric fan ang narecover ang isa nga wala nagamit kag makita nga natunaw lamang ang sa gwa sini kag intact ang sa sulod apang ang isa nga nakasaksak ang ginalantaw nga naoverheat bangud may nakita ang fire personnel nga lain na ang sa sulod sang makina ukon may sunog na.
Ginabanta nga nagdangat sa P900,000 ang halit nga ginbilin sang nagluntad nga sunog.
Ginpadala naman sang Bacolod Fire Station sa Manila Office sang Bureau of Fire ang recoveries para sa kumpirmasyon sang gintunaan sang sunog.
Ang balay nga nasunog ang isa ka ancestral house kun sa diin ang nagaistar ang care taker kag ginparentahan.
May yara sang lima ka kwarto kun sa diin duha lang ang gin-occupy kag isa na diri ang ginhalinan sang kalayo nga nagtuga sang sunog.
