BACOLOD CITY – Napabay-an nga mosquito killer ang gintunaan sang sunog sa Purok Sampaguita, Barangay 38, ciudad sang Bacolod kagab-i kun sa diin walo ka mga puluy-an ang ginlamon sang kalayo.
Ini ang ginkumpirmar ni Punong Barangay Gener Agpalo base sa paghinun-anon sini sa fire investigator sang Bureau of Fire Protection (BFP) Bacolod.
Base sa impormasyon, nagsugod ang kalayo sa balay ni Glen Celis kun sa diin may ginsindihan nga mosquito killer nga gintungtong sa ibabaw sang bayuan kag posible nasalapay ini sang sapat rason nga nagdukot sa mga bayo.
Apat katawo ang nag-angkon sang menor nga paso sa lawas nga ginalakipan ni Barangay Kagawad Helen Celis kag bana sini nga si Danilo, kag ang mag-amay nga sanday Glen kag Carmelino Celis.
Nagpadulong na ang Department of Social Services and Development (DSSD) agud tsekyaron ang napulo ka mga pamilya nga nasunugan.
Nagpatawag naman si Punong Barangay Agpalo sang special session kaina sang aga agud madesidiran kun ano kadaku ang financial assistance nga igahatag mga biktima.
Nahibaluan nga isa sa mga nasunugan ang newswriter sang Bombo Radyo Bacolod nga si Bombo Maximiano Padparan Jr.
